जिल्हा प्रतिनिधी (यश कायरकर):
तळोदी बाळापुर वनपरिक्षेत्रातील आलेवाही बिट अंतर्गत येणाऱ्या जीवनपूर गावाजवळ वाघाच्या हल्ल्यात एका व्यक्ती किरकोळ जखमी झाल्याची घटना दि. 19 जून 2025 रोजी दुपारच्या सुमारास घडली असून यात जखमी व्यक्तीचे नाव प्रविण मेघश्याम चिमलवार असे असून, तो मानसिकदृष्ट्या थोडा अस्वस्थ असल्याने अनेकदा गावाजवळील जंगलात भटकंती करत असतो.
तो गावापासून काही अंतरावर एका शेतालगत असलेल्या नाल्याजवळ बसलेला असताना, परिसरात भटकणाऱ्या वाघाने त्याच्यावर हल्ला केला. संभाव्यतः वाघाने त्याला एखाद्या वन्यप्राण्यासारखा भास मानून हल्ला केला. मात्र काही क्षणांतच माणूस असल्याची जाणीव होताच वाघाने त्याला सोडून दिले व जंगलात निघून गेला.
तात्काळ उपचार आणि वनविभागाची कारवाई
घटनेची माहिती मिळताच वनपरिक्षेत्र अधिकारी आरुप कंन्नमवार यांच्या मार्गदर्शनाखाली क्षेत्र सहाय्यक अरविंद माने आणि वनरक्षक पंडित मेकेवाड यांनी घटनास्थळी भेट देऊन मौका पंचनामा केला. जखमी प्रविण याला तातडीने सिंदेवाही येथील शासकीय रुग्णालयात हलविण्यात आले, जिथे त्याच्यावर प्राथमिक उपचार करण्यात आले.
त्याच्या उजव्या भुजेवर वाघाच्या दाताचे किरकोळ घाव असल्याचे डॉक्टरांनी सांगितले. त्याची प्रकृती सध्या स्थिर आहे.
सतर्कतेचे उपाय सुरू
वन विभागाने घटनास्थळी ट्रॅप कॅमेरे बसवले असून परिसरात गस्त वाढवण्यात आली आहे.
तसेच परिसरातील शेतकऱ्यांना व नागरिकांना जंगलालगत शेतात किंवा मोकळ्या जागेत जाताना विशेष काळजी घेण्याच्या सूचना देण्यात आल्या आहेत.
वन्यजीव आणि मानव सहजीवनाचा धागा राखणे गरजेचे
वन विभागाकडून नागरिकांना आवाहन करण्यात आले आहे की, वन्यजीवांच्या नैसर्गिक अधिवासात अनावश्यक फिरणे टाळावे आणि अशा घटनांची माहिती तात्काळ प्रशासनाला द्यावी.
